ໃນປີ 2010, ອົງການປົກຄອງນະຄອນຫຼວງວຽງຈັນ ໄດ້ຮ່ວມທຶນກັບ ບໍລິສັດ ລົງທຶນຕ່າງປະເທດ ແຂວງຢູນນານ ເພື່ອກໍ່ສ້າງ ແລະ ພັດທະນາເຂດພັດທະນາກວມລວມໄຊເຊດຖາ; ໃນນັ້ນ, ອົງການປົກຄອງນະຄອນຫຼວງວຽງຈັນ ຖືຮຸ້ນ 25%, ຊຶ່ງຕົ້ນຕໍແມ່ນຮັບຜິດຊອບປະສານງານພາກສ່ວນທີ່ກ່ຽວຂ້ອງຂອງຝ່າຍລາວ, ຊ່ວຍເຫຼືອອຳນວຍຄວາມສະດວກໃນການດຳເນີນເອກະສານຕ່າງໆ, ປະສານງານກັບຂະແໜງການກ່ຽວຂ້ອງ ເພື່ອອຳນວຍຄວາມສະດວກແກ່ການໂອນເງິນເຂົ້າອອກ ສປປ ລາວ ແລະ ປະສານກັບອຳນາດການປົກຄອງທ້ອງຖິ່ນທີ່ຄຸ້ມຄອງ ເຂດພັດທະນາ, ເພື່ອໃຫ້ສາມາດດຳເນີນການພັດທະນາ ໄດ້ຕາມຈຸດປະສົງເປົ້າໝາຍ.

ກຸ່ມບໍລິສັດ ດຶງດູດການລົງທຶນ ແມ່ນລັດວິສາຫະກິດຂະໜາດໃຫຍ່ຂອງ ສປ.ຈີນ ທີ່ຂຶ້ນກັບສູນກາງໂດຍກົງ, ຊຶ່ງມີສໍານັກງານໃຫຍ່ຢູ່ເຂດປົກຄອງພິເສດຮົງກົງ, ສ້າງຕັ້ງຂຶ້ນໃນປີ 1872 ໃນໄລຍະການເຄື່ອນໄຫວຂອງຕາເວັນຕົກ, ເປັນລັດວິສາຫະກິດທີ່ມີອາຍຸຫຼາຍສັຕະວັດ ແລະ ດຳເນີນທຸລະກິດແບບປະສົມປະສານ. ໃນປີ 2018, ກຸ່ມບໍລິສັດ ດຶງດູດການລົງທຶນ ແລະ ບໍລິສັດ ຮ່ວມທຶນ ລາວ-ຈີນ ຈຳກັດ ໄດ້ຮ່ວມທຶນກັນສ້າງຕັ້ງບໍລິສັດ ບໍລິຫານທຸລະກິດ ໄຊເຊດຖາ ຈຳກັດ ດ້ວຍທຶນຈົດທະບຽນ 1 ລ້ານໂດລາສະຫະລັດ ໂດຍມີຄວາມຮັບຜິດຊອບຕົ້ນຕໍໃນການຄຸ້ມຄອງ ແລະ ບໍລິຫານ ເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ.