ແຕ່ໃດມາກະສິກຳເປັນຂະແໜງການເສົາຄໍ້າເສດຖະກິດຂອງ ສປປ ລາວ, ມີປະຊາຊົນຫຼາຍກວ່າ 1,5 ລ້ານຄົນ ປະກອບອາຊີບດ້ານກະສິກໍາໃນທົ່ວປະເທດ, ການສົ່ງອອກສິນຄ້າກະສິກຳ ຍັງສາມາດນຳລາຍຮັບເງິນຕາຕ່າງປະເທດເຂົ້າມາລາວເປັນຈຳນວນຫຼວງຫຼາຍໃນແຕ່ລະປີ. ໃນຈໍານວນ 10 ສິນຄ້າ ທີ່ລາວ ສົ່ງອອກ ແຕ່ ມັງກອນ-ສິງຫາ ປີ 2022, ປະກອບມີ ມັນຕົ້ນແຫ້ງ, ຢາງພາລາ, ຫມາກກ້ວຍ ແລະ ນໍ້າຕານ ກວມເອົາ 4 ສິນຄ້າ, ມີມູນຄ່າທັງໝົດ 670 ກວ່າລ້ານໂດລາສະຫະລັດ. ເຖິງຢ່າງໃດກໍຕາມ, ການສົ່ງອອກສິນຄ້າກະສິກຳຂອງລາວໂດຍພື້ນຖານແລ້ວແມ່ນຍັງບໍ່ທັນໄດ້ປຸງແຕ່ງ ຫຼື ປຸງແຕ່ງແລ້ວກໍ່ມີມູນຄ່າເພີ່ມຕໍ່າ ແລະ ຄວາມຕ້ານທານຕໍ່ຄວາມສ່ຽງຕ່ຳ, ການນຳພັກ-ລັດລາວຍັງໄດ້ກ່າວຊ້ຳແລ້ວຊ້ຳອີກວ່າ ຈະປັບປຸງຄວາມອາດສາມາດໃນການປຸງແຕ່ງຜະລິດຕະພັນການກະເສດຂອງລາວເພື່ອໃຫ້ໄດ້ຜະລິດຕະພັນທີ່ເພີ່ມມູນຄ່າຫຼາຍຂຶ້ນ.

    ເຂດພັດທະນາ ຈະສຸມໃສ່ວິສາຫະກິດທີ່ແປຮູບກ່ຽວກັບການປຸງແຕ່ງອາຫານ, ຫົວອາຫານ, ແປຮູບໝາກໄມ້, ແປຮູບອາຫານວ່າງ ແລະ ແປຮູບສິນຄ້າກະສິກໍາເປັນຕົ້ນ, ໂດຍນໍາໃຊ້ທ່າແຮງຂອງ ສປປ ລາວ ທີ່ຕົ້ນທຶນດ້ານແຮງງານຕ່ຳ, ນະໂຍບາຍດ້ານພາສີ, ວັດຖຸດິບດ້ານກະສິກຳອຸດົມສົມບູນ, ສະຖຽນລະພາບທາງດ້ານການເມືອງ ແລະ ຄວາມປອດໄພຂອງປະເທດ, ເພື່ອດຶງດູດເອົາບໍລິສັດກ່ຽວຂ້ອງມາລົງທຶນຢູ່ເຂດພັດທະນາ. ວິສາຫະກິດປະເພດນີ້ມີລັກສະນະດຶງດູດມາລົງທຶນງ່າຍ, ເກນດ້ານເຕັກນິກຕໍ່າ, ການຈັດຫາວັດຖຸດິບສະດວກ ແລະ ຜະລິດຕະພັນກ້ວາງຂວາງ.

    ເຂດພັດທະນາຈະສຸມໃສ່ດຶງດູດນັກລົງທຶນທີ່ຢູ່ໃນເຂດສາມຫລ່ຽມແມ່ນ້ຳຈູ່ຂອງຈີນ, ພາກພື້ນຢຸນນານ-ກຸ້ຍໂຈວ-ເສສວນ ແລະ ບັນດາປະເທດອ້ອມຂ້າງລາວ, ເຊັ່ນ: ໄທ, ມຽນມາ, ອິນໂດເນເຊຍ ແລະ ມາເລເຊຍ ທີ່ມີວິສາຫະກິດການຜະລິດກະສິກໍາ. ພະຍາຍາມດຶງດູດເອົາວິສາຫະກິດຂະໜາດໃຫຍ່ 1-2 ແຫ່ງ ແລະ ວິສາຫະກິດຂະ ໜາດກາງ ແລະ ນ້ອຍ 4-5 ແຫ່ງ. ພາຍໃນ 3 ປີ ຈະສູ້ຊົນສ້າງກຸ່ມອຸດສາຫະກຳຂະແໜງການນີ້ທີ່ມີເນື້ອທີ່ກວ່າ  5 ເຮັກຕາ, ເນື້ອທີ່ການເຊົ່າໂຮງງານມາດຕະຖານຫຼາຍກວ່າ 20,000 ຕາແມັດ, ການລົງທຶນທັງໝົດ 100 ກວ່າລ້ານໂດລາສະຫະລັດ, ມູນຄ່າຜົນຜະລິດທັງໝົດ 200 ກວ່າລ້ານໂດລາສະຫະລັດ ແລະ ນຳໃຊ້ແຮງງານຫຼາຍກວ່າ 1,000 ຄົນ.